Жаркынбай Тойтуков жаңы кызматка дайындалды

Эмгек, социалдык камсыздоо жана миграция министрлигинин Орусиядагы коомдук өкүлү болуп Жаркынбай Тойтуков дайындалды. Бул тууралуу аталган министрликтен билдиришти.

Маалыматка ылайык, Жаркынбай Тойтуков учурда Новосибирск шаарында жашайт.

Ал 2009-2015-жылдары дагы аталган министрликтин коомдук өкүлү болуп иштеген.

"Министрликтин коомдук өкүлдөрү өлкөнүн четте жүргөн жарандарынын укугун жана кызыкчылыгын коргойт. Алардын милдети - эмгек мигранттарына ар тараптуу жардам жана кеңеш берүү, ошол өлкөдө жашаганга көнүп кетишине көмөктөшүү болуп саналат. Ошондой эле кыйын жагдайда калган мекендештерге жардам беришет", - деп жазылат анда.

Министрликтин учурда чет өлкөлөрдө 96 коомдук өкүлү бар жана алардын 90у Орусияда турат. Германияда 5, ал эми Украинада 1 коомдук өкүлү бар экени айтылат.

Автор: Каныкей Амантаева