Сузакта 28 жаштагы жаран көчөдө кетип бара жаткан унаага ок чыгарды

Сузак районунда унаада бара жаткан адамга ок атууга шектүү жаран кармалды. Бул тууралуу SUPER.KG порталына облустук милициядан билдиришти.

Окуя 29-августтан 30-августка караган түнү болжол менен саат 00:30 чамасында болгон. Анда Деу-Нексия үлгүсүндөгү унаада жүргүнчү катары бара жаткан 29 жаштагы Н.С. аттуу жаранга Хундай-Гетс үлгүсүндөгү унаа менен белгисиз адамдар келишип бир нече жолу ок атуучу курал менен ок атышкан.

Натыйжада Н.С. денесинен оор жараат алып, Жалал-Абад облустук бириккен клиникалык ооруканасына жаткырылган.

Аталган факты боюнча кылмыш иши козголгон.

Издөө иш-чараларынын жүрүшүндө бул кылмыш ишине шектүү катары Сузак районунун тургуну 1995-жылы туулган Б.М. кармалып, убактылуу кармоочу жайга киргизилген.

Учурда тергөө амалдары жүрүп жатат.

Автор: Азат Бейшенбеков