Алайдагы Гүлчө дарыясына чакан ГЭС курулат

Ош облусунун Алай районундагы Гүлчө дарыясына чакан гидроэлектр станциясы курулат. Бул тууралуу Орусия-Кыргыз өнүктүрүү фондунун жетекчиси Артём Новиков социалдык тармактагы баракчасында билдирди.

Маалым болгондой, ГЭС курууга 4 миллион 200 миң доллар бөлүү пландалып жатат. Долбоорду “Алай Гидро” ЖЧКсы ишке ашырат. Кубаттуулугу 9 мегаватты түзгөн жаңы ГЭС Алай районунун электр энергиясына болгон муктаждыгынын 86 пайызын камсыздайт. Станцияда заманбап жогорку технологиялык жабдуулар колдонулат.

Артём Новиков билдиргендей, акыркы эки жылда бул гидроэнергетика чөйрөсүндө Орус-Кыргыз өнүктүрүү фондунун колдоосу менен өлкөдө ишке ашырылып жаткан сегизинчи долбоор. Алардын жалпы кубаттуулугу 153 мегаватты түзөт. Бул жылына дээрлик 600 миллион киловатт-саат электр энергиясы дегенди билдирет.

ГЭС боюнча долбоорлордун жалпы баасы 183,6 миллион долларга бааланып, анын 39 пайызы, башкача айтканда, 72 миллион доллары фонд тарабынан бөлүнгөн.

Автор: Ширин Марат кызы