Бишкектин жаңы конуштарын жаратылыш газы менен камсыз кылуу иштери жүрүүдө

Бишкектеги жаңы конуштарды жаратылыш газына туташтыруу боюнча иштер жүргүзүлүп жатат. Бул тууралуу бүгүн, 14-сентябрда борбор калаанын мэриясынан билдиришти.

Маалым болгондой, быйыл 9 объектиде: Ак-Тилек, Ак-Тилек-2, Ак-Тилек Турбаза, Бакай-Ата 2, Ала-Арча, Төкөлдөш, Попеновка, Жогорку Көк-Жар жана Товарная көчөлөрүндө газдаштыруу боюнча курулуш-монтаждоо иштери жүргүзүлүүдө.

Газ түтүктөрүн куруунун жалпы пландалган узундугу 58,5 чакырымды түзөт. Бүгүнкү күндө 13 ,5 километри Ала-Арча, Ак-Тилек, Ак-Тилек-Турбаза, Ак-Тилек-2, Бакай-Ата, Төкөлдөш конуштарында курулуш иштери жүрүп жатат. Даярдоо иштери болсо Попеновка, Жогорку Көк-Жар жана Товарная көчөсүндө жүрүүдө.

Учурда газдаштырылган конуштардагы үйлөрдү жаратылыш газына кошуу иштери улантылууда. Бүгүнкү күндө 18 миң 558 турак жай газдаштырууга кошулду. Шаар боюнча 2023-жылдын башынан бери газ тармагына кошулган жаңы абоненттердин саны 5542 бирдикти түздү.