Министрлик ашууга чыга турган айдоочуларга эскертүү берди

Транспорт жана коммуникациялар министрлиги тоолуу аймактар жана ашуулар аркылуу жолго чыга турган айдоочулардан унаа дөңгөлөктөрүн жайкыдан кышкыга алмаштырып чыгууну эскертти. Бул тууралуу бүгүн, 18-сентябрда аталган министрликтин басма сөз кызматынан билдиришти.

Маалым болгондой, бүгүн ,18-сентябрга караган түнү Ысык-Көл облусундагы Чоң-Ашуу жана Сөөк ашууларына 30 сантиметр калыңдыктагы кар жаады. Ошондой эле Долон ашуусуна кар жаап, учурда күн бүркөк экени айтылды.

Ошондой эле министрлик Барскоон-Ак-Шыйрак, Каракол-Эңилчек, Бишкек-Нарын-Торугарт унаа жолдорундагы бул ашууларда учурда каттам бар жана өлкөнүн башка жолдорунда да унаа кыймылына эч кандай чектөөлөр жок экенин маалымдады.

Белгилей кетсек, буга чейин Кыргызгидромет борбору 18-сентябрда түнкүсүн Чүй, Ысык-Көл, Нарын облустарынын айрым жерлеринде, Талас, Ош, Жалал-Абад, Баткен облустарынын тоолорунда жаан жаап, бийик тоолуу райондорунда кар жаай турганын билдирген. Ал эми күндүз Жалал-Абад, Ысык-Көл, Нарын облустарынын көпчүлүк аймактарында, Чүй, Талас, Ош, Баткен облустарынын айрым жерлеринде жаан жаай турганы айтылган.