Эртеңден баштап Кыргызстанда нөшөрлүү жаан жаашы мүмкүн

Эртең, 20-сентябрдан баштап Кыргызстанда аба ырайы кескин өзгөрүп, нөшөрлүү жаан жаашы күтүлөт. Бул тууралуу Өзгөчө кырдаалдар министрлиги билдирди.

"Өзгөчө кырдаалдар министрлигинин Кыргызгидромет кызматы шашылыш билдирет! 20-22-сентябрь күндөрү өлкөнүн аймагында аба-ырайы кескин өзгөрүп, 20-сентябрда көпчүлүк аймактарда жаан жаап, айрым жерлерде катуу жаашы, күн күркүрөшү, тоолуу райондордо кар жаашы күтүлөт. Батыштан соккон шамалдын ылдамдыгы секундасына 4-9 метрден, айрым жерлерде 15-20 метрге жетиши күтүлөт", - деп жазылат билдирүүдө.

Ошондой эле министрлик Нарында үшүк жүрүшү мүмкүн экенин эскертти.

Мындай туруксуз аба ырайы автоунаа, энергетика жана коммуналдык кызматтардын ишин жана жайыттарда малды кармоону, айыл чарба жумуштарын кыйындатат.

Автор: Азат Бейшенбеков