Нарындагы Калмак-Ашуусунда МАН унаасы тыгылып калып, айдоочусу дайынсыз жоголду

Нарындагы Калмак-Ашуусунда чыга албай туруп калган жүк ташуучу унаанын айдоочусу изделүүдө. Бул тууралуу Өзгөчө кырдаалдар министрлиги билдирди.

19-сентябрь күнү Нарын облусунун Кочкор районунда Бишкек-Нарын-Торугарт унаа жолунун болжол менен 275-чакырымында (Калмак-Ашуу ашуусу) МАН үлгүсүндөгү жүк ташуучу унаа ашуудан чыга албай, жолду тосуп калгандыгы тууралуу маалымат түшкөн.

Саат 23:15те ыкчам түрдө жерине 3 куткаруучу тартылган. Бирок куткаруучулар жерине жеткен учурда токтоп турган унаанын айдоочусу жок болуп чыккан.

Айдоочу Беларусь өлкөсүнүн жараны. Учурда ал изделүүдө.

Министрлик кошумча маалымат берилерин билдирди.

Автор: Азат Бейшенбеков