Ысык-Көлдө 9 килограмм баңгизат менен Чүй облусунун тургуну кармалды.

Ысык-Көлдө 9 килограмм баңгизат менен Чүй облусунун тургуну кармалды.Бул тууралуу SUPER.KG порталына Ысык-Көл облустук милициясынын маалымат кызматынан билдиришти.

Маалымдалгандай, баӊгизаттарды мыйзамсыз жүгүртүүгө каршы күрөшүү кызматынын ыкчам кызматкерлерине Ысык-Көл районунун аймагында жергиликтүү тургун мыйзамсыз баңгизат сактап жүргөндүгү жөнүндө маалымат түшкөн.

Аталган маалымат каттоого алынып, кылмыш-жаза кодексинин 283-беренесинин (Баңгизат каражаттарын, психотроптук заттарды жана алардын аналогдорун сатып өткөрүү максатысыз мыйзамсыз даярдоо) менен кылмыш иши козголгон.

Жүргүзүлгөн тергөө-ыкчам иштеринин натыйжасында мыйзамсыз баӊгизатын сактап жүргөн Чүй облусунун 46 жаштагы тургуну, убактылуу Чолпон-Ата шаарында жашап жаткан Д.Б. кармалган.

Кылмышка шектүү жарандын жашап жүргөн үйүндө тинтүү иштери жүргүзүлүп, натыйжада жапайы кендирдин өзгөчө жыты бар өсүмдүктөр табылып алынган.

Соттук-химиялык экспертизанын корутундусу боюнча, алынган зат марихуана баңги затына таандык экени аныкталган. Анын таза салмагы 9 килограмм 427 граммды түзгөн.

Райондук соттун чечими менен шектүүгө карата козголгон кылмыш ишинин алкагында тергөө иштерин жүргүзүү учурунда бир айга камакка алуу баш коргоо чарасы тандалып алынган.

Тергөө иштери уланууда.

Автор: Максуда Кудайбердиева
Фото: Ысык-Көл ОИИБ