Ошто "Үлүштүк курулуш" долбоору алкагында көп кабаттуу үйдүн курулушу башталды

Бүгүн, 16-октябрда Ош "Үлүштүк курулуш" долбоорунун алкагында 9 кабаттуу үйдүн курулушуна капсула салынды. Бул тууралуу Ош мэриясынан билдиришти.

Маалыматка ылайык, турак-жай 96 батирден турат. Үйдүн 1-кабатында соода түйүндөрү, жер төлөсүндө унаа токтоочу жай болот. Короосуна балдар аянтчасы курулуп, көрктөндүрүү жана жашылдандыруу иштери жүргүзүлөт.

"Жаңы турак-жай ички жасалгалары жана туташтырылган коммуникациялары менен толук түрдө 2025-жылдын төртүнчү кварталынын аягында пайдаланууга берилет", - деп айтылат маалыматта.

Белгилей кетсек, аталган долбоор шаар тургундарын турак-жай менен камсыздоо максатында Ош шаарынын мэриясы тарабынан үчүнчү ирет ишке ашырылууда.

Буга чейин, "Үлүштүк курулуш" долбоорунун алкагында эки көп кабаттуу үйдүн курулушу башталган.

Автор: Гүлкайыр Абдиманнап кызы