Кумтөр кенинде кырсык болуп, айдоочу каза болду

Кумтөр кенинде кырсык болуп, оор жүк ташуучу техниканын 35 жаштагы айдоочусу каза болду. Бул тууралуу "Кумтөр Голд Компани" ЖАКтан билдиришти.

Маалыматка ылайык, кырсыктын чоо-жайы тууралуу эч нерсе айтылган эмес. Бирок учурда адам өлүмүнө алып келген окуянын себептери иликтенип жаткандыгы айтылат.

"Кумтөр Голд Компанинин" жетекчилиги жана эмгек жамааты каза болгон кызматкердин үй-бүлөсүнө жана жакындарына терең кайгыруу менен көңүл айтат.

Кызматкердин үй-бүлөсүнө тийиштүү көмөк көрсөтүлүп, материалдык жардам берилет", - деп айтылат маалыматта.

Компаниядан кырсыктын себептери боюнча иликтөөнүн жыйынтыгы менен кошумча маалымат берилерин кошумчалашты.

Автор: Гүлкайыр Абдиманнап кызы