Бишкекте чөнтөкчүлөр маршруткадан өспүрүм кыздын телефонун уурдап жаткан учурда кармалды

Бишкекте бир катар чөнтөк уурулук фактысына шектелгендер кармалды. Бул тууралуу бүгүн, 9-ноябрда шаардык милициядан билдирди.

Маалыматка ылайык, 3-ноябрда коомдук транспортто бара жаткан жашы жете элек кыздын чөнтөгүнөн 22 миң сом турган Redmi 11pro үлгүсүндөгү уюлдук телефонун уурдап, качып кетүүгө аракет кылган жарандарды кылмыш болгон жерден милиция кызматкерлери кармап калган.

Аталган факты боюнча Кылмыш-жаза кодексинин 205-беренесине (Уурдоо) ылайык кылмыш иши козголгон.

Ыкчам-иликтөө иштеринин натыйжасында мурда бир нече жолу соттолгон 2001-жылы туулган Т.Б., 1995-жылы туулган Б.А., 1999-жылы туулган А.К. аттуу жарандар райондук башкармалыктын тергөө кызматына жеткирилген. Тинтүү учурунда шектүүлөрдөн ар кандай үлгүдөгү 7 даана уюлдук телефон табылып, алынган. Шектүүлөр убактылуу кармоочу жайга киргизилген.

"Учурда алардын ушул сыяктуу башка да кылмыштарды жасоого катыштыгы бар экендиги аныкталды. Шектүүлөрдүн кылмыштуу аракеттеринен жапа чеккен жана кандайдыр бир маалыматы бар жарандар төмөнкү телефондор аркылуу байланышса болот: 0(554) 11-03-14, 0(772) 80-30-38, 0(700) 61-11- 19 же 102", - деп айтылат билдирүүдө.

Автор: Айзада Кыдырмышева
Фото: Бишкек ШИИББ