Эрдоган Газа тилкесиндеги согуш боюнча АКШга катуу шарттарды койду

БУУ жана башка эл аралык уюмдар Израиль армиясынын Газа тилкесиндеги карапайым калкты кыргынга алышынын алдында активдүү эмес. Бул тууралуу Түркиянын президенти Режеп Тайып Эрдоган билдиргенин Anadolu басылмасы жазды.

"Мусулмандар өлтүрүлгөндө БУУ жана башка эл аралык уюмдардын натыйжасыз жана сокур экенине дагы бир жолу күбө болдук. Эл аралык коомчулук Газадагы кыргындарга каршы чара көрүшү керек. Бирок БУУнун Коопсуздук Кеңешинин дагы бир жолу аракетсиз экенин көрүп жатабыз", - деген ал Эр-Рияддан кайтып келгенден кийин журналисттерге берген маегинде.

Ал ошондой эле Израиль-Палестина жаңжалындагы АКШнын позициясын сынга алды. Анын айтымында, эгер Вашингтон бул жерди Израилдин аймагы деп эсептесе, Түркия менен АКШнын Газа боюнча келишими болушу мүмкүн эмес.

"Активдештирилиши керек болгон эң маанилүү өлкө - Израилге таасири бар Америка. Газа - Палестина элинин жери. Америка муну моюнга алышы керек. Эгер Байден Газа Палестина элинин жери эмес деген көз карашта болсо, анда биздин келишимибиз мүмкүн эмес", - деп кошумчалаган ал.

Эрдоган дагы бир жолу Палестинанын ХАМАС кыймылы "террордук уюм эмес, бардык күчү менен өз жерлерин коргоого жана мекени үчүн күрөшүп жаткан адамдар" деди.

Автор: Азат Бейшенбеков