"Жеңил унаа качырып...". Бишкекте троллейбус жол кырсыкка кабылды

Бүгүн, 13-ноябрда Бишкектеги №10 каттамдагы троллейбус Байтик баатыр көчөсү менен түштүктү көздөй бара жатып жол кырсыкка кабылды. Бул тууралуу калаа мэриясынан билдирди.

Ага ылайык, окуя болжол менен эртең менен саат 8:10 чамасында болгон.

"Троллейбустун айдоочусунун айтымында, транспорттун сол жагынан жеңил автоунаа кысып чыккан. Андан качууга аракет кылып рулду башкара албай калып, жол жээгиндеги бакты сүзүп токтогон. Жабыркагандар жок", - деп айтылат билдирүүдө.

Жол кырсык Кайгуул милициясы менен камсыздандыруу компаниясына катталганы кошумчаланды.

Автор: Бек Оморбеков
Фото: Бишкек мэриясы