"680 миң сом алган". Ошто 59 жаштагы жаран жеке фирманын өкүлдөрүн коркутуп акча алып жүргөнгө шектелип кармалды

Кара-Сууда жеке фирманын өкүлдөрүнөн акча талап кылып жүргөн жаран кармалды. Бул тууралуу бүгүн, 27-ноябрда Ички иштер башкармалыгы кабарлады.

Маалыматка ылайык, ушул жылдын 23-ноябрында ички иштер органдарына жеке фирманын өкүлү кайрылып, узак убакыттан бери аларга өзүн коррупцияга каршы элдик көзөмөл коомунун мүчөсүмүн деп тааныштырган адам коркутуп-үркүтүү жолу алты айдын ичинде 680 миң сом өлчөмүндө акча каражатын алгандыгын, опузалоо дагы деле уланып жатканын билдирген.

Бул факты боюнча Кылмыш-жаза кодексинин 208-беренеси (опузалап талап кылуу) менен кылмыш иши козголгон.

Милиция кызматкерлери тарабынан кылмышка шектүү катары Алай районунун тургуну 1964-жылы туулган М.Ч. кармалып, Кара-Суу райондук милиция бөлүмүнүн убактылуу кармоочу жайына киргизилген.