Тоңдогу жарылуу менен коштолгон кырсык: Кырсыктын болжолдуу себеби айтылды

Тоңдогу оор жүк ташуучу унаанын жол кырсыгына кабылышы боюнча Транспорт министрлиги билдирүү жасады.

"Болжолдуу маалыматтарга караганда транспорттун токтотуучу системасы (тормоз) иштен чыгып, айдоочу жолдогу парапеттерди сүзүп, өрттөнүп кеткен. Жеринде аймакты караган №955 Жол тейлөө ишканасынын жолчулары, ӨКМ, жол инспекторлору ыкчам аракеттерди көрүп, тилсиз жоо өчүрүлдү. Алдын-ала маалыматка караганда оор жүк ташуучу унаанын айдоочусу каза болду.

Учурда жолду тазалоо иштери жүрүүдө. Жакынкы мүнөттөрдө каттам жанданат", - деп билдиришти министрликтен.

Кечээ, 28-ноябрь күнү кечинде Тоңдо оор жүк ташуучу унаа жол кырсыгына кабылып, фейерверктер атылган. Кырсыктан бир адам каза болгонун Өзгөчө кырдаалдар министрлигинен билдиришкен.