Мирбек Атабеков Мээрим аттуу бийкечке үйлөндү

Бул жылы көпчүлүк элдин катарында шоу-бизнес өкүлдөрүнүн бойдок кыз-жигиттери түгөйлүү болушту. Ошолордун катарында кечээ, 2013-жылдын 16-декабрында кыргыз эстрадасынын белгилүү ырчысы, "Супер-Инфонун " тандоосу боюнча "Заманыбыздын супер ырчысы" аталган Мирбек Атабеков ашыгы Мээрим Төлөпбергенди кыргыздын салты боюнча сөйкө салып, колдон алып кетти. Бул тууралуу ырчынын менеджери билдирди.

Анын айтымында, кыз узатуу тоюна Мирбек менен Мээримдин эң жакын адамдары гана катышкан. "Кыздын ата-энеси кыз узатуу тоюнан кийин күйөө бала тарапты "Жаннат" эс алуу борборунда коноктоду. Саналуу, 50 чакты гана адам бардык. Мирбектин бул жакшылыгына ырчылардан Гүлнур Сатылганова жана Замир Арыкбаев катышты. Мээримге ак жоолук салып, чачыла чачып алып кеттик. Эки жаштын үйлөнүү үлпөт тою жакынкы күндөргө белгиленди",- деп кошумчалады ырчынын менеджери Нургүл.

Белгилей кетсек, Мирбек Атабеков быйыл жайында "Супер-Инфого" жана SUPER.KG порталына "Түз байланышка" келгенинде үй-бүлө тууралуу берилген суроолорго да жооп берген. Колдонуучунун "Эмне үчүн Мээримди тандадың? Ал башка кыздардан эмнеси менен өзгөчө?" деген суроосуна "Анын акыл-эстүүлүгү, тарбиясы, бир сөз менен айтканда, ал менин табитиме туура келет" деп жооп кайтарган. Дагы бир колдонуучунун "Сүйлөшкөн кызың Мээрим той болор күнү элдин көзүнчө сага келатып эле «передумала» деп качып кетсе эмне кылат элең?" деп калтырган суроосуна ырчы "Алдадың" деген клибимдегидей болуппу? Ха-ха... Андай болбойт болуш керек. Антсе кино болуп кетет. Бул суроо кайдан, эмнеден улам чыкты деп таң калып жатам... Биринчиден, качырбаганга аракет кылабыз. Мээрим качып кетеби, мени менен калабы, так маалыматын жакында билесиздер го" деген жообун берген.

Негизи эки жаштын буга чейин эле ар кандай маданий иш-чараларда, тойлордо чогуу ээрчишип жүргөнү белгилүү. Алтургай Мирбектин ашыгына өзү көйнөк тандап бергени тууралуу айтканы да бар.