ТИМ Екатеринбургда күч органдары мигранттарга орой мамиле кылган видео боюнча үн катты

Орусиянын Екатеринбург шаарында жүргүзүлгөн рейд учурунда үч курулуш объектисинде 150 чет элдиктин ичинен Кыргызстандын 40 жаранынын документтерин текшерүү фактысы аныкталды. Бул тууралуу бүгүн, 20-январда Тышкы иштер министрлигинен билдирди.

Маалыматка ылайык, Кыргызстандын Екатеринбургдагы Башкы консулдугунун кызматкерлери жергиликтүү полиция органдарына, чет өлкөлүк жарандарды убактылуу кармоочу жайга жана курулуш объектилерине барышкан.

Анда Кыргызстандыктар тарабынан миграциялык мыйзам бузуулардын аныкталбаганы жана аларга карата Орусиянын аймагынан административдик түрдө чыгаруу боюнча чечим кабыл алынбаганы маалым болгон.

"Рейд болгон жерден массалык маалымат каражаттарына тараган кадрларда Кыргызстандын үч жараны тартылган. Биздин жарандардын айтымында, текшерүү иш-чараларынын жүрүшүндө коңшу өлкөнүн жарандары качып, укук коргоо кызматкерлеринен жашынууга аракет кылышкан. Ушуга байланыштуу полиция тарабынан качкан чет элдик жарандарды кармоо, ошондой эле текшерилип жаткандардын эркин жүрүүсүнө чектөө чаралары көрүлгөн.

Кыргызстандын жарандары укук коргоо органдарынын аракеттерине каршы арыз жазуудан баш тартты. Орусиянын Свердлов облусунун адам укуктары боюнча ыйгарым укуктуу өкүлү Татьяна Мерзлякова менен консультациялар жүргүзүлүп, ал укук коргоо органдары тарабынан жүргүзүлгөн рейд боюнча териштирүү болорун билдирди", - деп айтылат маалыматта.

Буга чейин социалдык тармактарда Екатеринбургда курулушта мыйзамсыз иштегендерди издөө учурунда милиция жана прокуратура кызматкерлеринин чет өлкөлүк жумушчуларга орой мамиле жасаганы тартылган видео тараган.