Орусияда кулаган Ил-76 учагы: Зеленський бул боюнча үн катты

Украинанын президенти Володимир Зеленський Орусиянын Белгород облусунда Ил-76 аскердик-транспорттук учагынын кыйрашы боюнча комментарий берди.

"Мен тиешелүү жетекчилерге телефон чалып учактын кыйрашы жана борттогу туткундар тууралуу маалыматты алдым. Орусия биздин коомдо украиналык туткундардын өмүрү, жакындарынын сезимдери менен ойноп жатканы көрүнүп турат", - деди ал кечки кайрылуусунда.

Ал ошондой эле учак Орусиянын аймагына кулап түшкөнүн эске алуу менен мүмкүн болушунча так фактылардын бардыгын аныктоо керектигин баса белгиледи.

"Фактылар" азыр негизги сөз болуп саналат. Украинанын Коопсуздук кызматы бардык жагдайларды иликтеп жатат. Ал эми мен Украинанын тышкы иштер министрине Украинадагы болгон маалыматтар боюнча өнөктөштөргө маалымат берүүнү тапшырдым. Биздин мамлекет эл аралык иликтөө жүргүзүүнү талап кылат", - деди президент.

Кечээ, 24-январда Орусиянын Белгород облусунда ИЛ-76 аскердик-транспорттук учагы кулап түшкөн. Учакта Белгород облусуна алмашуу үчүн жеткирилген 65 украиналык аскер кызматкери, ошондой эле алты экипаж мүчөсү жана үч коштоп жүргөн адам болгону белгилүү болду.

Автор: Азат Бейшенбеков