Пашинян Армения Украина маселеси боюнча Москванын өнөктөшү эмес экенин айтты

Армения Украина маселеси боюнча Орусиянын өнөктөшү эмес. Бул тууралуу Армениянын премьер-министри Никол Пашинян Германиядагы армян диаспорасынын өкүлдөрү менен Мюнхенде болгон жолугушууда билдиргенин чет элдик басылмалар жазышты.

Пашинян 1991-жылкы Алма-Ата декларациясы Советтер Союзу тарагандан кийин эгемендүүлүккө ээ болгон республикалардын эгемендүүлүгүн жана аймактык бүтүндүгүн таануунун негизи экенин айтты. Анын айтымында бул Украинадагы кырдаалга да тиешелүү болушу керек.

"Бул оор кырдаал, биздин абал да оор. Биз Алма-Ата декларациясын кабыл алабыз, бирок ал бизге гана тиешелүү эмес. Алма-Ата декларациясын СССРдин 13 республикасы, анын ичинде Орусия жана Украина кабыл алган. Башкалардын арасында алар мунун демилгечилери, Орусия Беловеж келишимине кол койгондон кийин, Украина менен Беларусь СССР мындан ары жок деп чечишти жана алар эгемендүү мамлекет болуп, бири-биринин чек арасын тааныган", - деген Пашинян.

Анын айтымында, Украинага карата Алма-Ата декларациясы бул өлкөнүн эгемендигин жана аймактык бүтүндүгүн таануу үчүн негиз болуп саналат, анткени бул документ баарына тиешелүү.

"Эгер биз аны жок кылсак, анда биз баарын жок кылабыз. Мен буга чейин эле айтканмын, Армения Украина маселеси боюнча Орусиянын союздашы эмес, бул биздин чынчыл позициябыз. Мен бул тууралуу эки жыл мурун дагы айткан элем. Украина эли биз үчүн дос эл”, - деген ал.

Автор: Азат Бейшенбеков