"Париж-2024": Акжол Махмудовдун салмагында Олипиадага дагы бир күчтүү балбан кошулушу мүмкүн

Армениялык мурдагы Дүйнө чемпиону Арсен Жулфалакян Париждеги Олимпиада оюндарына катышуу үчүн өз күчүн сынай баштады.

Тагыраагы, ал Аргентинанын жарандыгын алып, Мексиканын Акапулько шаарында өтүп жаткан Панамерикалык квалификациялык турнирге катышты. Ал 1/4 финалда америкалык Камал Бейге утулуп, Олимпиадага жолдомо ала алган жок. Жолдомо алуу үчүн финалга чыгышы керек болчу.

Жулфалакяндын Париждеги Олимпиада оюндарына жолдомо алуу үчүн акыркы мүмкүнчүлүгү Стамбулда 9-майда баштала турган дүйнөлүк турнир болот.

Анын Армения курама командасы үчүн ат салышууга эч кандай мүмкүнчүлүгү жок экенин эскерте кетели. Анткени 77 килограмм салмакта Армениянын атынан Европанын 3 жолку чемпиону Малхас Амоян күрөшөт.

36 жаштагы Арсен Жулфалакян 2012-жылы Лондондо өткөн Олимпиада оюндарында күмүш байге уткан. Ошондой эле 2014-жылы Ташкентте өткөн Дүйнө биринчилигинде 75 килограмм салмакта чемпион болгон.

2012-жылы Лондондо өткөн Олимпиада оюндарында ал алгачкы баскычта кыргыз балбаны Данияр Көбөновду утуп алган. Финалда орусиялык Роман Власовго жеңилген.

Автор: Азат Бейшенбеков