Бүгүн, 28-март SUPER.KG медиа порталынын туулган күнү. Портал 18 жашка толду. Маалымат-маанайшат порталы- Кыргызстандагы эң көп нускалуу "Супер-Инфо" гезитинин жеке сайты катары ачылган. Алгач порталга аталган гезиттин электрондук версиясы жайгаштырылчу. Ал эми ишмердүүлүгү 2006-жылга барып такалат.
Ошол кезде чет жерде жашап, окуп, гезит сатып ала албаган кыргыз жарандарына бул көктөн издегени жерден табылгандай болгон. Кулач жайган порталга көп өтпөй кабарлар жазылып, алдыңкы медиалардын сап башына чыккан. 2008-жылы портал “Медиа-портал” бөлүмү менен толукталып, анын ичинен “Элдик видео” бөлүмү ачылган. 2011-жылы "Жылнаама" бөлүмү ишке кирип, анда дүйнөдө жана кыргыз жеринде, жакынкы жана алыскы тарыхтагы урунттуу окуялардын күндөрү, атактуулардын туулган жана каза тапкан күндөрү так көрсөтүлгөн.
Ал эми 2012-жылы SUPER.KG порталы "Супер-Инфо" гезитинен бөлүнүп, өз алдынча компания катары ишин уланткан.
Бүгүнкү күндө медиада Соңку Кабар, "Супер-Инфо", Видео, Медиа портал, Кинозал, Жылнаама, жана Суперстан бөлүмдөрү камтылган.
Сайтта коомдук жаңылыктар онлайн режиминде Соңку кабар бөлүмү аркылуу элге жеткирилип турат. Портал окурмандарын саясат, коом жана турмуш, спорт, маданият, шоу-бизнес, элдик кабар, кылмыштар, кырсыктар, түркүн дүйнө жана башка рубрикаларындагы маалыматтар менен камсыздап келет.
2008-жылы порталдын YouTube каналы ачылып, 2018-жылы YouTube'дун “Күмүш баскычына”, ал эми 2022-жылы "Алтын баскычына" ээ болгон.
“M-Vector” консалтинг компаниясынын 2023-жылы жүргүзгөн сурамжылоосунун жыйынтыгында SUPER.KG медиа порталы интернет ресурстары көп окулган жана көрүлгөн медиалардын арасында 3-орунда жайгашкан. Ал эми кыргыз тилдүү медиалардын арасында 2-орунду ээлеген.
SUPER.KG порталынын
Инстаграм жана
Ютуб каналында 1 миллиондон ашык катталуучусу бар. Бир айдын ичинде сайтта орточо эсеп менен 4 миллион 882 миң 486дан ашык кароо болот. Мындан тышкары сайттын Фейсбук (94871), Тикток (41400), Телеграм (3047), Вконтакте, Ондноклассники , Х социалдык тармактарында катталуучуларынын саны арбын.
Медиа порталда ошондой эле "Элдик кабар" бөлүмү дагы бар. Бул аркылуу карапайым эл коомдогу көйгөйлүү маселелерди айтып, портал аны жарыялап, жардам берип келет.
