Бишкектин тургунунун кол саат, акча, телефонун тартып алган 23 жаштагы жигит кармалды

Бишкекте тоноого шектүү жаран кармалды. Бул тууралуу Октябрь РИИБинен билдирди.

Маалыматка ылайык, милицияга Х.К. аттуу жаран арыз менен кайрылган. Ал 2-апрель күнү Малдыбаев жана Жаманбаев көчөлөрүнүн кесилишинде белгисиз адам күч колдонуп, 20 миң сомдук Xiaomi Poco X4 Pro үлгүсүндөгү телефонун, 8 миң сомдук электрондук кол саатын, 6 миң сом турган кулакчынын жана 35 миң сом накталай акчасын тартып алганын айткан.

Бул факты боюнча Кылмыш-жаза кодексинин 206-беренесине (Тоноо) ылайык кылмыш иши козголгон.

Шектүү катары 2001-жылы туулган М.Б. аттуу жаран кармалып, убактылуу кармоочу жайга киргизилди.

Учурда анын ушул сыяктуу кылмыштарды жасоого катыштыгы бар экендиги аныкталууда.