Тышкы иштер министринин орун басары БУУнун өкүлү менен сүйлөшүүлөрдү өткөрдү

Өлкөнүн Тышкы иштер министринин биринчи орун басары Асеин Исаев Бириккен Улуттар уюмунун башкы катчысынын биринчи орун басары Амина Мохаммед менен сүйлөшүүлөрдү өткөрдү. Бул тууралуу министрликтен билдирди.

Билдиргендей, жолугушуу 7-майда Нью-Йорк шаарында болуп, Кыргыз мамлекети менен БУУнун ортосундагы кызматташуу маселелери талкууланган.

Анда алар былтыркы жылдагы биргелешкен иштин жыйынтыгын чыгарып, быйылкы жылга карата өз ара аракеттенүү пландарын, алдыдагы иш-сапарларды, БУУнун Башкы Ассамблеясынын 79-сессиясын, Келечек саммитин, БУУнун Климаттын өзгөрүшү боюнча Бонн конференциясын жана Климаттын өзгөрүшү боюнча БУУнун Алкактык конвенциясынын Тараптарынын конференциясынын 29-сессиясын белгилешкен.

Ошондой эле сүйлөшүүдө Исаев кыргыз тараптын демилгелери жана "Тоолор жана Климат" жаңы глобалдык диалогун БУУнун Алкактык конвенциясынын Тараптарынын конференциясынын жылдык күн тартибине киргизүү боюнча иш-аракеттери тууралуу маалымат берген.

Өз кезегинде Амина Мохаммед эл аралык аренада тоо күн тартибин илгерилетүүдөгү Кыргызстандын лидерлик ролун белгилеген.

Белгилей кетсек, өлкө делегациясы БУУнун токойлор боюнча форумунун 19-сессиясына катышуу үчүн Нью-Йорк шаарына барган.

Автор: Кылымбек Бейшеев
Фото: ТИМ