Бишкекте өзгөчө ири өлчөмдө алдамчылыкка шектүү жаран кармалды

Бишкекте өзгөчө ири өлчөмдө алдамчылыкка шектелип уюшкан кылмыштуу топ менен байланышы бар жаран кармалды. Бул тууралуу УКМКдан билдирди.

Маалыматка ылайык, алдоо жана коркутуу жолу менен башка жарандын мүлкүн жана биргелешкен бизнестеги үлүшүн ээлеп алган А.М.Т аттуу жаран кармалып, УКМКнын тергөө абагына киргизилди.

"Ыкчам иликтөө иш-чараларынын жүрүшүндө, кармалган жарандын Бишкек шаарынын аймагындагы аянты 3 гектардан ашык, баасы алдын ала эсептөөлөр боюнча 10 миллион долларды түзгөн муниципалдык жер тилкелерин мыйзамсыз жеке менчикке чыгарууга катыштыгы бар экендиги аныкталды.

Мындан тышкары А.М.Т. криминалдык авторитет менен туугандык байланыштын артына жашынып, көзөмөлдөөчү органдарды коркутуу жолу менен муниципалдык жер тилкелерин пайдалангандыгы үчүн белгиленген 3 миллион сомдон ашык суммадагы ижара акысын кем баалап, төлөгөн эмес", - деп айтылат маалыматта.

Учурда бул мыйзамсыз фактыларга тиешеси бар кызмат адамдарын жана башка адамдарды аныктоо боюнча тиешелүү чаралар көрүлүүдө.

Автор: Бек Оморбеков
Фото: УКМК