Өлкөдө жаштарга кандай мүмкүнчүлүктөр бар? Кыргызстан жаштар конгрессинин төрагасы менен маек

SUPER.KG порталынын #Азыр рубрикасынын бул чыгарылышында өлкөдөгү жаштар, алардын кыялдары, максаттары, тилектери тууралуу Кыргызстан жаштар конгрессинин төрагасы Жакшылык Бекназаров менен маектештик.

Белгилей кетсек, Бекназаров учурда Салымбеков бизнес мектебинин директору, Республикалык Кыргызстан жаштар конгрессинин төрагасы, Салбуурун федерациясынын вице-президенти кызматтарын аркалап келет.

Сиздин ишиңиз кандай мааниге ээ? Жаштарга эмнелерди үйрөтөсүз?

- Менин ишимдин маанилүү аспектилеринин бири – ЮНИСЕФтин долбоорлорунун алкагында мектеп окуучулары үчүн инсандык өсүү боюнча тренингдерди өткөрүү. Бул мага жаштардын инсандардын өнүгүшүнө жана келечектеги ийгилигине таасир этүүгө мүмкүндүк берет. Ошого байланыштуу мен Жаштар саясатынын отличниги деген наамга ээ болгом. Коомго жана жаштарга эң көп нерсени жасоого аракет кылам, анткени алар өлкөбүздүн келечеги.

Азыркы жаштар эмнени кыялданышат?

- Кыргызстандын азыркы жаштары окууга жана иштөөгө гана умтулушпайт. Жаштар кесипкөй ийгиликтерди, өз бизнесин түзүүнү, саякаттоону, чет өлкөдө билим алууну, үй-бүлөлүк бакытты жана коомдук турмушка активдүү катышууну кыялданышат. Ошондой эле экологиялык абалды жакшыртууга, гендердик теңдик үчүн күрөшкө жана спорттук жетишкендиктерди өнүктүрүүгө умтулушат. Кыргызстандын жаштары өздөрүнө жана урпактарына жакшы келечек түзүүгө умтулуп, мезгилдин кыйынчылыктарына жана сыноолоруна даяр деп айта алам.

Жаштардын кандай максаттары бар? Эмнеге кызыгышат?

- Учурда Кыргызстандын жаштарында өзүн-өзү өнүктүрүү жана максаттарына жетүү үчүн көптөгөн мүмкүнчүлүктөр бар. Негизги мүмкүнчүлүктөрдүн бири билим алуу болуп саналат. Жаштар ар кандай стипендиялар жана алмашуу программалары аркылуу өлкөнүн жогорку окуу жайларында жана колледждеринде, ошондой эле чет өлкөлөрдө сапаттуу билим ала алышат.

Мындан тышкары жаштар өздөрүнүн кесиптик чеберчилигин өлкөнүн ичинде жана чет өлкөлөрдө өткөрүлүүчү стажировкаларга, мастер-класстарга жана тренингдерге катышуу аркылуу өнүктүрө алышат. Жаш ишкерлерге бизнес идеяларын ишке ашырууга жана ийгиликтүү ишкер болууга жардам берүү үчүн көптөгөн колдоо программалары бар.

Кыргызстанда жаштарга кандай мүмкүнчүлүктөр бар?

- Жаштар ар кандай жаштар уюмдары, волонтёрдук долбоорлор жана иш-чаралар аркылуу өлкөнүн коомдук турмушуна активдүү катышып, өздөрүн өнүктүрө алышат. Бул аларга саясий жана коомдук процесстерге таасирин тийгизүү менен гана чектелбестен, лидерлик сапаттарды, командада иштөө шык-жөндөмдөрүн да өнүктүрүүгө мүмкүндүк берет.

Ошондой эле Кыргызстан жаштары өзүн-өзү өнүктүрүүгө, билим алууга, карьералык өсүүгө жана коомдук турмушка катышуу мүмкүнчүлүктөрүнө ээ. Бул мүмкүнчүлүктөрдү жигердүү пайдаланып, максаттарга жетүү үчүн аракет кылуу гана маанилүү.