Депутат Сокулукта 120 орундуу мектепте 500дөн ашык окуучу окуп жатканын айтты

Жогорку Кеңештин депутаты Аманкан Кенжебаев Сокулуктагы Биринчи май айылында 500дөн ашык окуучу 120 орундуу мектепте 3 нөөмөт менен окуп жатканын айтты. Бул тууралуу ал бүгүн, 16-майда Жогорку Кеңештин жыйынында билдирди.

"Кийинки окуу жылына кошумча имарат салуу керек. Бул маселе боюнча тиешелүү комитеттерге протоколдук тапшырма берип койсоңуздар", - деди депутат.

Ошондой эле эл өкүлү Тажикстандан көчүп келген этникалык кыргыздар айдоочулук күбөлүккө байланыштуу көйгөйлөргө туш болуп жатканын билдирди. Кенжебаев өз сөзүндө алар Тажикстанга кире албастыгын, мындан улам жол коопсуздук кызматкерлери маселе жаратып жатканын белгилеп, ИИМ, Тышкы иштер министрлиги бул маселени чечүү керектигин айтты.

Мындан сырткары депутат жол маселесин көтөрүп, Сокулуктагы стадиондун курулушун бүтүрүүгө жардам көрсөтүүнү суранды.

Автор: Айпери Бакталбек кызы