“Административдик айып пул салынат”. Бишкекте мэрдин орун басары семичке чаккан тургунду тартипке чакырды (видео)

Кечээ, 15-майда Бишкек мэринин орун басары Рамис Алиев Айни көчөсүндөгү унаа токтоочу жайда семичке чагып, кабыгын жерге ыргытып жаткан айдоочуну тартипке чакырган видеосу менен бөлүшкөн.

Анда тургун семичке баскан адамдардын, өткөн унаалардын изи менен жок болуп кете тургандыгын айтып, "бул жерди эч ким тазалабайт, шыпырбайт" деп ишендирүүгө аракет кылган.

Анда Рамис Алиев Айни көчөсүн 72 жаштагы апа тазалай тургандыгын айтып, шаардын кайсыл жери болбосун кайдыгер болбой, тазалыкты сактоо негизги милдет экендигин түшүндүргөн.

Ошондой эле ал тазалыкты сактабагандарга административдик айып пул салына тургандыгын кошумчалаган.

“Турмуш-тиричилик таштандыларын жана башка буюмдарды белгиленбеген жерлерге таштоо - жеке жактарга 5 миң 500 сом өлчөмүндө, юридикалык жактарга 17 миң сом өлчөмүндө айып салууга алып келет”, - деп жазган Алиев.