ИИМ Акыркы коңгуроодо коопсуздук чаралары күчөтүлөрүн маалымдады

Мектептерде окуу жылынын аякташына карата өтүүчү Акыркы коңгуроо салтанатында 4000ден ашуун милиция кызматкери коопсуздукка жана коомдук тартипке көзөмөл кылат. Бул тууралуу Ички иштер министрлигинен билдирди.

Малыматка ылайык, 25-май күнү милиция күчөтүлгөн тартипте иштеп, мектептерде милиция кызматкерлери жана кайгуул күзөт кызматтары иштейт.

"Мектептердеги акыркы коңгуроо иш-чарасынан кийин ата-энелеринин уруксаты менен көптөгөн бүтүрүүчүлөр иш-чараны өз алдынча улантууда. Айрым учурларда жашы жете элек өспүрүмдөрдүн унааларды башкаруусу кайгылуу кесепеттерге алып келет. Өткөн жылы мындай фактылар орун алган.

Андан сырткары ата-энелердин көзөмөлүнүн жоктугунан көптөгөн балдар тыюу салынган жана белгиленбеген жерлерге сууга түшүшөт. Өткөн жылы жабдылбаган суу объектилеринде, аймактарда өспүрүмдөрдүн каза болгон учурлары катталган.

Муну эске алып, ата-энелерден жана бүтүрүүчүлөрдөн мыйзам бузуулар же аларга өбөлгө түзгөн окуялар аныкталган учурда 102 номуруна кайрылсаңыздар ыкчам түрдө жардам көрсөтүлөт", - деп айтылат маалыматта.