Колумбия Палестинада элчилигин ачат

Колумбиянын президенти Густаво Петро Палестинада Колумбиянын элчилигин ачууга буйрук берди. Бул тууралуу чет элдик басылмалар жазды.

Маалыматка караганда, Колумбиянын тышкы иштер министри Луис Гилберто Мурильо президент Колумбиянын Рамалладагы элчилигин ачууга буйрук бергенин билдирген. Оккупацияланган батыш жээгиндеги бул шаар Палестина автономиясынын де-факто борбору катары кызмат кылат. Палестиналыктар негизи Израиль аскерлери басып алган Чыгыш Иерусалимди өздөрүнүн борбору деп эсептешет.

Министр Мурильо белгилегендей, элчиликтин көчүрүлүшү БУУнун Башкы Ассамблеясынын жакында өткөн добушун чагылдырат, анда мамлекеттердин басымдуу көпчүлүгү Палестинага толук мүчөлүк жана таанууну берүүнү жакташкан. Мурильо жакында башка өлкөлөр да Палестина мамлекетин БУУда таанууну колдой баштаарын кошумчалады.

Өткөн жылдын ноябрында Колумбия Түштүк Америкада биринчилерден болуп Израилдеги элчисин чакыртып алган. Майдын башында президент Петро Израилдин Газадагы аракеттери үчүн дипломатиялык мамилесин толук үзөрүн жарыялаган. Элчилик 3-майда жабылган.

Петро ошондой эле Израилдин премьер-министри Биньямин Нетаньяхуну АКШ менен БУУнун шаарда баш калкалаган миллион качкындын өмүрүн тобокелге салбоого чакырганына карабай Газаны басып алуу жана Рафахтагы чабуулун улантуу чечими үчүн катуу сынга алды.

Колумбия Израил менен байланышын үзгөн Латын Америкасынын биринчи өлкөсү болгон жок. Боливия Израил менен мамилесин былтыр октябрдын аягында үзгөн. Латын Америкасынын башка өлкөлөрү, анын ичинде Чили жана Гондурас өз элчилерин чакыртып алышты. Түркия, Иордания, Бахрейн, Гондурас, Түштүк Африка, Белиз жана Чад да ушундай кылышты. 22-майда Ирландия менен Норвегия Палестина мамлекетин тааныган. Буга жооп катары Израиль бул өлкөлөрдөн элчилерин чакыртып алды.

Автор: Бек Оморбеков