Салтанат Нукенованын өлүмү: Бишимбаевди кармаган полиция кызматкерлери жазаланды

Астанада мурдагы улуттук экономика министри Куандык Бишимбаевди кармаган милиция кызматкерлери жазаланды. Казакстандын Ички иштер министрлиги эки кызматкерге катуу сөгүш жарыяланганын билдирди.

"Бул факты боюнча кызматтык иликтөө аяктады. "Укук коргоо кызматы жөнүндө" Казакстандын мыйзамынын 19, 56-57-беренелерине, ошондой эле кызматтык тартипти бузгандыгы үчүн тартип комиссиясынын чечимине ылайык, патрулдук полиция полкунун кызматтык инспекторуна жана "Коомдук жайларды булгоо" кодексинин 434-2-беренесинин талаптарын бузгандыгы үчүн Йесил районунун ИИБинин тергөөчүсүнө катуу сөгүш жарыяланды", - деп айтылат башкармалыктан.

9-апрелде сотто милициянын төшүндөгү камерадан Куандык Бишимбаевдин кантип кармалганы тартылган видео көрсөтүлдү. Көчөдөгү милиция кызматкерлери анын кишендерин чечип, чылым беришкен. Милиция бөлүмүнө жөнөтүлүү алдында айыпталуучудан укук коргоо кызматкери окуянын чоо-жайын тактап жатып Салтанат Нукенова боюнча "ал өзү тажатыптыр да, ээ?" деп сураган.

Эскерте кетсек, 31 жаштагы Салтанат Нукенованын жансыз денеси 2023-жылдын 9-ноябрында Астана шаарындагы "BAU" ресторанында табылган. Аны сабап өлтүрүүгө шектелип күйөөсү, мурдагы экономика министри Куандык Бишимбаев кармалган. Ага Казакстандын Кылмыш-жаза кодексинин 110-беренеси (Кыйноо), 99-беренеси (Өтө мыкаачылык менен адам өлтүрүү) жана 14-беренеси (Өтө оор кылмыштын кайталанышы) боюнча айып тагылды.

Ага байланыштуу, 13-майда Куандык Бишимбаев келинчеги Салтанат Нукенованы өлтүргөн деп айыпталып, 24 жылга эркинен ажыратылган. Мурдагы аткаминер жазасын күчөтүлгөн тартиптеги түзөтүү абагында өтөйт.

Автор: Максуда Кудайбердиева.