Министрлик пиязды массалык түрдө төгүү боюнча видеого түшүндүрмө берди

Буга чейин Фейсбук социалдык тармагына пияздын массалык түрдө талаага ыргытылып жаткан видео тараган. Суу ресурстары, айыл чарбасы жана кайра иштетүү өнөр жай министрлиги бүгүн, 27-майда видео боюнча түшүндүрмө берди.

Маалыматка ылайык, аталган видео чындыкка дал келбейт жана Кыргызстандын аймагынан сырткары жерде тартылган.

Тактап айтканда, видео Казакстандын Шор-Төбө аймагында орун алгандыгы белгилүү болду.

Ошондой эле министрлик учурда өлкө аймагында кампаларда сакталып турган былтыркы пияздар дыйкан-фермерлерге эмес, ортомчуларга (алып-сатарларга) таандык экендигин белгиледи. Бул пияздын жаңы түшүмүнүн баасы туруктуу бойдон сакталышына көмөк көрсөтөт.

Министрлик айыл чарба багытында өндүрүлгөн продукциялардын баасын туруктуу кармоо максатында жана дыйкан-фермерлерге тиешелүү көмөк көрсөтүү үчүн Координациялык кеңеш түзүлгөндүгүн билдирди.

Кеңешке министрликтин жооптуу кызматкерлери кирип, ага министрдин орун басары С.Н.Насирдинов төрагалык кылат.

Автор: Айжанар Рыспек кызы