Эдил Байсалов Женевада Эл аралык эмгек уюмунун башкы директору менен жолукту

Министрлер кабинетинин төрагасынын орун басары Эдил Байсалов Женевада Эл аралык эмгек конференциясынын талаасында Эл аралык эмгек уюмунун (ЭЭУ) башкы директору Жильбер Унгбо менен жолугушту. Бул тууралуу аталган мекемеден билдиришти.

Маалымдалгандай, Эдил Байсалов ЭЭУнун жетекчилигине Кыргызстанда COVID-19дан кийинки мезгилде жетишилген олуттуу социалдык-экономикалык прогресс жөнүндө маалымат берип, өзгөчө экономиканын өсүү темпи жогорулаганын, жумушчу күчкө болгон суроо-талаптын жана эмгек акынын жогорулашын белгиледи.

"Бүгүнкү күндө Кыргызстан тышкы эмгек мигранттарынын санын дээрлик 300 миң адамга кыскарта алды. Бүгүнкү күндө өлкө ичинде алар үчүн жумуш орундарын түзүп гана тим болбостон, Кыргызстан азыр эл аралык эмгек мигранттары үчүн жагымдуу өлкөгө айланып баратат", - дейт Эдил Байсалов.

Ага ылайык, ал Министрлер кабинети иммигранттардын укуктарын коргоого жана эмгектин тийиштүү шарттарын камсыз кылууга өзгөчө көңүл буруп жатканын, айрыкча өлкө Түштүк Азиянын эмгек мигранттарынын барган сайын популярдуу жерине айланып баратканын белгиледи.

Ал эми ага байланыштуу ЭЭУнун башкы директору Кыргызстандын өкмөтүнүн ачык диалогго даярдыгын кубаттады жана анын өлкөдөгү эмгек шарттарынын стандарттарын, анын ичинде социалдык-экономикалык шарттарды жана гендердик аспектилерди эске алуу менен жогорулатууда кыргыз тарап менен мындан ары кызматташууга умтула тургандыгына ишендирди.

Мындан тышкары жыйындын алкагында Кыргызстандын “Эмгек чөйрөсүндө зомбулукту жана куугунтуктоону жоюу жөнүндө” 190-конвенцияга кошулуусу жөнүндө ратификациялык грамотаны ЭЭУнун башкы директоруна тапшыруу аземи болду.

Белгилей кетсек, Кыргызстан бул конвенцияга Борбор Азия мамлекеттеринен биринчи болуп кошулган. Бул иш-чара Кыргызстандын адам укуктарын ар тараптуу коргоого берилгендигинин дагы бир далили гана болбостон, бул демилгени региондогу мамлекеттерге дагы жайылтуу үчүн негиз болуп калды.

Автор: Максуда Кудайбердиева.