АКШ Грузияга каршы санкцияларды киргизди

АКШ Грузиянын "адам укуктарын бузган" деп айыпталган ондогон жарандарына визалык чектөө киргизди. Бул тууралуу Мамлекеттик департаменттин басма сөз катчысы Мэттью Миллер брифингде билдирди.

Мэттью Миллер

Анын айтымында, бир катар парламент мүчөлөрүнө жана алардын үй-бүлөлөрүнө санкция берилди. Миллер мамлекеттик катчы Энтони Блинкен жарыялаган жаңы виза чектөө саясатын “чет элдик агенттер мыйзамына” байланыштуу экенин эске салды.

"Виза чектөөлөрүнүн биринчи тизмесинде "Грузин кыялы" партиясынын мүчөлөрү, парламенттин депутаттары, укук коргоо органдарынын кызматкерлери жана жөнөкөй жарандар бар", - деди Мамлекеттик департаменттин өкүлү.

Вашингтон грузин жетекчилиги өз аракеттерин кайра карап чыгып, өзүнүн “демократиялык жана евроатлантикалык умтулууларына” кайтып келет, антпесе кошумча чаралар көрүлөт деп күтүүдө.

14-майда грузин парламенти жарандардын нааразычылыгына жана АКШ менен Евробиримдиктин эскертүүлөрүнө карабастан “чет элдик агенттер жөнүндө мыйзам долбоорун” кабыл алган. 18-майда Грузиянын президенти документке вето койгон, бирок 28-майда парламент бул ветону жокко чыгарган. 3-июнда спикер Шалва Папуашвили “чет элдик агенттер жөнүндө” мыйзамга кол койгону белгилүү болду.

Автор: Бек Оморбеков