Ошто сейил бакта мыйзамсыз соода-сатык кылгандарга түшүндүрүү иштери жүргүзүлдү (сүрөт)

Токтогул Сатылганов атындагы сейил бакта мыйзамсыз жана өзүм билемдик менен соода-сатык иштерин, оюн-зоок багытындагы иш-аракеттерди жүргүзүп жаткан тараптарга түшүндүрүү иштери жүргүзүлдү. Бул тууралуу бүгүн, 7-июнда мэриядан билдиришти.

Маалымдалгандай, мындай мыйзамсыз балмуздак саткан соода түйүндөр, велосипеддерди жана электросамокаттарды ижарага бергендер, уруксатсыз орнотулган аттракциондор аныкталып ишмердүүлүгү токтотулду.

Ага ылайык, иш-чарага Ош шаарынын мэриясынын муниципалдык менчик башкармалыгынын, укук коргоо органдарынын, "Сулайман-Тоо" МАБнын кызматкерлери катышты.

"Аталган сейил бакта мындан ары да өзүм билемдик менен уруксаты жок орнотулган соода түйүндөрү, оюн-зоок аянттары болсо чара көрүлөрү эскертилди", - деп айтылат маалыматта.

Автор: Максуда Кудайбердиева.