Өлкөдө "Кыргызстан жаштар кыймылы" түзүлдү

Өлкөдө "Кыргызстан жаштар кыймылы" түзүлүп, биринчи курултайы өттү. Бул тууралуу Маданият, спорт жана жаштар саясаты министрлигинен билдиришти.

Маалыматка ылайык, иш-чара 8-июнда өтүп, ага өлкөнүн коомдук жана маданий турмушуна активдүү катышууга кызыкдар 200дөн ашык жаштар чогулду.

"Иш-чаранын жүрүшүндө кыймылдын презентациясы сунушталды. Эсептөө комиссиясы, курултайдын кеңеши бекитилди. Андан соң эсептөө палатасы жана курултайдын кеңешинин протоколу тааныштырылып, Кыргызстан жаштар кыймылынын төрагасы шайланды", - деп жазылат маалыматта.

Кыймылдын максаты - жалпы максаттарга жетүү үчүн жаштарды бириктирүү, инсанды өнүктүрүү жана коомдук турмушка активдүү катышуу, жаштардын өзүн-өзү өнүктүрүүгө, кесиптик жактан өсүүгө жана өз потенциалын ишке ашырууга умтулуусун колдоо.