Индияда эки поезд кагылышып, кеминде 15 адам каза болду

Индияда экспресс поезд менен жүк ташыган поезд кагылышып, кеминде 15 адам каза болду. Мындай маалыматты дүйнөлүк басылмалар жазышууда.

Кырсык бүгүн, 17-июнда эртең менен болгон. Анда жүк ташыган поезд менен жүргүнчүлөрдү ташып бара жаткан поезд кагылышкан.

"Нью-Джалпайгури шаарына жакын жерде орун алган поезд кырсыгынан каза болгондордун саны 15ке жетти. Алардын арасында жүк ташуучу поезддин айдоочусу бар. 60тай адам жаракат алды", - деп жазылат маалыматта.

Алдын ала маалыматтарга караганда, жүк ташуучу поезддин машинисти "токтоо" сигналын өткөрүп жиберип, андан соң экинчи поездди сүзүп алган.

Буга чейин кырсыктан 5 адам каза болуп, 20-30дай жаран жаракат алганы кабарланган болчу.

Автор: Айжанар Рыспек кызы