Израил аскерлери Газанын бир катар аймактарына сокку уруп, кеминде 75 киши набыт болду

Жума күнү израилдик аскерлер Газа тилкесиндеги үйлөрдү, качкындар жашаган чатырларды жана суу кудуктарын тейлеген муниципалдык кызматкерлерди бомбалады. Al Jazeera телеканалынын маалыматына караганда, кеминде 75 киши набыт болду.

Бул күн палестиналыктар үчүн акыркы апталардагы эң кандуу күндөрдүн бири болду. Артиллериялык аткылоо жана израилдик танктардын аткылоосу мурда израилдик аскерлер тарабынан "гуманитардык аймак" деп жарыяланган Рафах шаарындагы Аль-Маваси аймагында баш калкалаган жер которгон адамдарды бутага алды.

Палестинанын Саламаттыкты сактоо министрлиги билдиргендей, Аль-Мавасидеги кол салууда кеминде 25 палестиналык набыт болуп, 50 киши жараат алды.

Андан бир нече саат мурун Израилдин Газадагы муниципалдык кеңсесине жасаган соккусунан кеминде жети киши, анын ичинде суу кудуктарын тейлеген беш жумушчу набыт болгон.

Калк жыш отурукташкан жана согуш жүрүп жаткан Аль-Шати качкындар лагериндеги үйгө дагы бир кол салуудан 10 адам каза болуп, 17си жарадар болгонун Al Jazeera билдирди.

Башка соккулар Газанын эски шаарын, Зейтун аймагын жана Нусейрат качкындар лагерин бутага алды.

Автор: Бек Оморбеков