Орусия Түндүк Корея менен түзүлгөн келишимди эскертүү деп атады

Орусия менен Түндүк Кореянын ортосундагы келишим аймактын көйгөйлөрүн аскерий жол менен чечүүнү пландап жаткан өлкөлөр үчүн эскертүү болуп саналат. Бул тууралуу Орусиянын тышкы иштер министринин орун басары Андрей Руденко РИА Новостиге берген маегинде айтты.

"Бул келишим жарым аралдын жана бүтүндөй аймактын көйгөйлөрүн аскердик жол менен чечүүнү күткөн же пландаштырып жаткан өлкөлөр үчүн кандайдыр бир эскертүү", - деди Руденко.

Руденко Орусия Түндүк-Чыгыш Азиядагы азыркы кырдаалды бузууну көздөбөй турганын, аймактагы чыңалуунун негизги себеби АКШнын саясаты экенин айткан.

Владимир Путин менен Ким Чен Ын 19-июнда Ар тараптуу стратегиялык өнөктөштүк келишимине кол коюшкан. Ал катышуучулардын бирине кол салуу болгон учурда мамлекеттердин бири-бирине дароо жардам көрсөтүүнү камтыйт.

Автор: Азат Бейшенбеков