Ноокатта селден каза болгондордун саны 9га жетти

Өзгөчө кырдаалдар министрлиги Ноокат районунда селдин кесепетинен каза болгондордун саны тогуз кишиге жеткенин билдирди.

Министрлик бүгүн, 30-июнда тараткан маалыматка таянсак, Абшыр-Ата айылында издөө иштеринде жаш баланын сөөгү табылган. Маркумдун жансыз денеси ИИБ кызматкерлерине өткөрүлүп берилген. Учурда аты-жөнү, туулган жылы такталууда.

Бүгүн издөө иштерине ӨКМден 53 куткаруучу, ИИМден 120 кызматкер, Коргоо министрлигинен 50 кызматкер, жергиликтүү тургундардан 150 адам тартылды.

Буга чейин 28-июнда катталган Ноокаттагы селден сегиз адам каза болгону маалымдалган.

Автор: Айжанар Рыспек кызы
Фото: ӨКМ