Кыргыз волейболчу кыздары Мальдивде чемпион болушту (видео)

Кыргызстандын волейбол боюнча кыздар арасындагы жаштар курама командасы (U-20) Мальдив аралдарынын Мале шаарында өткөн CAVA чемпиондугунда биринчи орунду ээледи.

Чемпиондукка жалпысынан төрт команда катышты. Кыргыз кыздары алгачкы эки оюнда Непал менен Мальдив курамаларын 3:0 эсебинде утса, үчүнчү оюнда Шри-Ланкага 3:2 эсебинде утулган.

Топтолгон упайлардын негизинде Кыргыз курамасы финалга чыгып, кайра эле Шри-Ланка менен финалда ойноду. Анда Кыргыз курамасы реванш алып, 3:0 эсебинде Шри-Ланканы жеңип алды.

Жыйынтыгында Кыргыз курамасынан 4 волейболчу кыз турнирдин мыктысы болду. Алар:

Мыкты чабуулчу - Роза Расулбек кызы;

Мыкты байланыштыруучу - Алия Керезова;

Мыкты тосмочу - Сайкал Амиракулова;

Мыкты диагональ чабуулчу - Айтурган Айтбекова;

Турнирдин эң мыкты оюнчусу - Роза Расулбек кызы.

Курама команда башкы машыктыруучу Курсантбек Уланбек уулунун жетекчилиги алдында мелдешке катышты.