Израил Бейрутка абадан сокку урду

Кечээ, 30-июлдун кечинде Израилдин аскердик аба күчтөрү "Хезболланын" штаб-квартирасы жайгашкан Бейрут шаарынын түштүк четиндеги райондоруна сокку урду. Бул тууралуу Ливандын улуттук маалымат агенттигине таянуу менен чет элдик басылмалар жазышты.

Маалыматка караганда, күчтүү жарылуу болгон, бирок курмандыктар тууралуу азырынча маалымат жок. Чабуул Израилдин учкучсуз учагы тарабынан жасалып, Бейруттун түштүк четиндеги имаратты үч жолу ракета менен атып, эки кабатын талкалаганын жергиликтүү телеканал билдирди.

Израил армиясы соккуну ырастап, бута Израил басып алган Голан дөңсөөлөрүндөгү друздардын Мажал Шамс шаарчасында ишемби күнү болгон ракеталык чабуулга жоопкер болгон "Хезболланын" командирине карай болгонун билдирди. "Хезболла" азырынча Израилдин чабуулу боюнча комментарий бере элек.

Бул окуя Израил менен "Хезболланын" ортосундагы тирешүүнүн акыркы айлампасы болуп калды. 27-июлда оккупацияланган Голан дөңсөөлөрүндө 12 адамдын өмүрүн алган Мажал Шамска сокку урулгандан кийин чыңалуу кескин күчөдү.

Израилдин Газага чабуулу башталган 2023-жылдын октябрь айынан бери Израил-Ливан чек арасындагы абал өтө курч бойдон калууда. Ар кандай булактардын маалыматына караганда, Израилдин соккуларынан 350гө жакын "Хезболланын" согушкерлери жана 100дөн ашуун жай тургун набыт болду. Израил 23 жайкын тургун жана 17 аскер набыт болгонун билдирди.

Израил менен Хезболланын ортосундагы жаңжал Израилдин Газа тилкесине басып киришинин фонунда жүрүп жатат. "Хезболла" Газадагы палестиналыктарды колдоо үчүн иш-аракет кылып жатканын айтып, бирок жалпы согушту көздөбөй турганын айтууда. Шийилер тобу эгер Израил менен ХАМАСтын ортосунда келишим түзүлсө, элдешүү келишимине баш ийүүгө даяр экенин айтып, бирок ал күчөй турган болсо кеңири масштабдуу согуш чыгып кетиши мүмкүн экенин да эскертет.

Жергиликтүү саламаттыкты сактоо органдарынын маалыматы боюнча, Газадагы тогуз айга созулган кагылышууда 39 миң 400дөн ашуун палестиналык (көбү аялдар жана балдар) курман болуп, 91 миңге жакыны жарадар болгон. Кырдаалды курчуткан блокада жашоочуларды тамак-аш, таза суу жана дары-дармексиз калтырды.

Эл аралык сот Израилди геноцидге айыптап, 6-майда оккупацияланганга чейин бир миллиондон ашуун палестиналыктын баш калкалоочу жайына айланган Рафах шаарындагы аскердик операцияларды токтоосуз токтотууну талап кылды.

Автор: Бек Оморбеков