Ысык-Көлдө жол боюна мыйзамсыз курулган 13 объект буздурулду

Ысык-Көл облусунда унаа жолдун боюна мыйзамсыз курулган 13 объект буздурулду. Бул тууралуу бүгүн, 9-августта Суу ресурстары, айыл чарба жана кайра иштетүү өнөр жайы министрлигинен билдирди.

Маалыматка ылайык, министрликтин алдындагы Жерди жана сууну көзөмөлдөө боюнча кызмат Ысык-Көл облусунда Барскоон - Каракол унаа жол тилкесинин аймагына мыйзамсыз салынган майда жана чоң соода курулуштарды аныктады. Жыйынтыгында жалпы 13 объект буздурулуп, мыйзамсыз ээлеп алынган жер аянттары баштапкы калыбына келтирилди.

Мындан сырткары Жети-Өгүз районуна караштуу Даркан, Саруу жана Кызыл-Суу айылында комиссия менен биргеликте Жер мыйзамдары боюнча түшүндүрүү иштери жүргүзүлдү.

Автор: Бек Оморбеков