Женнифер Лопес актёр Бен Аффлек менен ажырашууга арыз берди

Америкалык белгилүү ырчы жана кино жылдызы Женнифер Лопес эки жылдык никеден кийин актёр Бен Аффлек менен ажырашууга арыз жазды. Бул туурасында чет элдик басылмалар жазышууда.

Маалыматка ылайык, Лопес кечээ, 20-августта Лос-Анжелесте ажырашууга арызын берген, ал Жоржия штатында экинчи ирет өткөн үйлөнүү аземинин эки жылдыгына туш келген.

Документтерге ылайык, Лопес менен Аффлек расмий эмес түрдө 26-апрелде ажырашышкан, башкача айтканда, алардын эки ажырымга кетүүсүнө дээрлик төрт ай болгон.

Айта кетсек, 2000-жылдардын башында сүйлөшүп жүргөн ырчы менен актёр 2021-жылы мамилесин улантып, 2022-жылы 16-июлда баш кошушкан.

Акыркы бир нече айдан бери Лопес менен Аффлек ажырашып, чогуу жашаган үйүн сатыкка койгону тууралуу бир нече маалыматтар чыккан.

Автор: Замира Ниязбекова