Израиль Ливанда ФАТХ кыймылынын командирин өлтүрдү

Палестиналык ФАТХ кыймылы Ливандын түштүгүндө Израилдин аба соккусунан улам өзүнүн аскер командирлеринин бири Халил аль-Макда өлгөнүн билдирди. Бул тууралуу чет элдик басылмалар жазды.

Маалыматка караганда, окуя Сидон шаарында болуп, ал жерде аль-Макданын унаасы дрон чабуулуна кабылган.

Израилдин Коргоо күчтөрү операцияны тастыктап, ал-Макда менен анын бир тууганы Мунир Хезболла жана Ирандын Революциялык гвардиясы менен көптөн бери кызматташып келгенин билдирди.

Буга чейин Израиль Газа тилкесинде ХАМАСтын аскерий канатынын командири Мохаммед аль-Дейфтин өлтүрүлгөнүн кабарлаган. 31-июлда ХАМАСтын саясий бюросунун лидери Исмаил Хания Тегеранда өлтүрүлгөн, бирок Израиль бул окуяга тиешеси бар экенин тастыктай элек.

Палестинанын президенти Махмуд Аббас жетектеген ФАТХ кыймылы Палестинанын негизги саясий жана аскердик уюмдарынын бири.

Автор: Бек Оморбеков