Баткенде үйүндөгү чакасына эле баңгизат өстүрүп жүргөн жаран кармалды

Кызыл-Кыя шаарынын 65 жаштагы тургуну өзү жашаган үйүндө баңги өсүмдүгүн өстүргөнгө шектелип кармалды. Бул тууралуу Баткен ОИИБинен билдирди.

Маалыматка ылайык, тиешелүү экспертиза шектүүнүн үйүнөн табылган 3 даана идишке өстүрүлгөн өсүмдүктөр баңгизаттын конопля (канабис) түрү экендигин аныктаган. Алынган өсүмдүктөрдүн салмагы 300 граммды түзөт.

Бул факты боюнча Кылмыш-жаза кодексинин 288-беренесинин (Баңгизат каражаттарын камтыган өсүмдүктөрдү себүү жана өстүрүү) негизинде кылмыш иши козголгон.

Милиция учурда текшерүү иштери жүрүп жатканын кошумчалады.

Автор: Кылымбек Бейшеев
Фото: Баткен ОИИБ