Бишкекте үч унаа сүзүшүп, эки айдоочу жаракат алды

Бишкекте үч унаанын катышуусунда жол кырсыгы катталып, эки адам жаракат алды. Бул туурасында Милициянын кайгуул кызматы бүгүн, 4-сентябрда билдирди.

Маалыматка ылайык, кырсык кечээ, 3-сентябрда саат 22:30 чамасында болгон.

Анда Mercedes-Benz үлгүсүндөгү унаа Л.Толстой көчөсүндө чыгыш багытка бара жатып Хундай-Соната менен кагылышкан, андан соң карама-каршы келе жаткан Киа-Оптима унаасы менен сүзүшкөн.

Mercedes-Benz'тин 19 жаштагы айдоочусу шаардык оорукананын жандандыруу бөлүмүнө жаткырылган. Анын баш мээси чайкалып, жамбаш сөөгү сынган. Ал эми Хундай Сонатанын айдоочусу эки бутунан ачык түрдө сынык жаракат алып ооруканага түшкөн.

Унаалар айып короосуна коюлуп, тийиштүү соттук-экспертизалар дайындалды. Учурда тергөө иштери жүрүүдө.

Автор: Айжанар Рыспек кызы