Баасы 147 миллион сом турган жер тилкеси мамлекетке кайтарылды (видео)

Улуттук коопсуздук мамлекеттик комитети наркы 147 миллион сом турган жер тилкеси мамлекеттин балансына кайтарылганын билдирди.

Маалыматка ылайык, атайын кызмат 2008-жылы Коргоо министрлигинин балансындагы 0,58 гектар жер тилкеси министрликтин айрым кызмат адамдарынын кийлигишүүсү менен жеке менчикке мыйзамсыз берилип кеткенин аныктаган.

"2008-жылдан 2022-жылга чейин аталган жер аянты ар кандай адамдарга, ишканаларга катталган. Бүгүнкү күндө ал участок "Б" ЖЧКсына сатылып кеткени такталган. Бул компаниянын уюштуруучулары маркум Көлбаевдин уюшкан кылмыштуу тобунун аффилирленген жактары болуп саналат", - деп айтылат маалыматта.

УКМК компания жер тилкесин өз ыктыяры менен мамлекетке кайтарып бергенин белгилеп, мыйзамсыз ишке барган министрликтин кызмат адамдарын жоопкерчиликке тартуу үчүн тергөө иштери жүрүп жатканын кошумчалады.