Кочкордо талаадан жансыз дене табылып, милиция шектүү кишини дароо колго түшүрдү

Нарында адам өлтүрүүгө шектелип 42 жаштагы жаран кармалды. Бул тууралуу облустук милиция билдирди.

Маалыматка ылайык, 3-сентябрь күнү саат 14:35 чамасында Кочкор районунун 66 жаштагы тургуну милиция бөлүмүнө келип, кампанын артында бирөөлөрдүн мушташынан адам өмүрү кыйылганын кабарлаган.

Жерине барган укук коргоо кызматкерлери Кочкор айылындагы Кырман кампасынын артында талаада жансыз дене жаткандыгын көрүшкөн. Сыртынан кароо жүргүзгөн учурда күч колдонулганы тастыкталып, каза болгон жаран Исакеев айылынын 64 жаштагы тургуну экендиги аныкталган.

Бул факты боюнча Кылмыш-жаза кодексинин 122-беренесинин (Адам өлтүрүү) незинде кылмыш иши козголгон.

Шектүү катары Кочкор районун 42 жаштагы тургуну кармалып, камакка алынган. Ал маркум менен бирге арак ичип отурганда пикир келишпестик чыгып, аны чаап, тээп жибергендигин айтып берген.

Учурда өлүмдүн себептерин аныктоо боюнча тиешелүү экспертизалар дайындалып, тергөө иштери уланууда.

Автор: Кылымбек Бейшеев
Фото: Нарын ОИИБ