Орусияда адам өлтүүргө шектелген чет өлкөлүктөр Бишкектен кармалды (видео)

Адам өлтүрүүгө шектелип эл аралык издөөдө жүргөн 2 чет элдик жаран Бишкектен кармалды. Бул тууралуу Ички иштер министрлиги билдирди.

Маалыматка ылайык, Азербайжан менен Орусиянын 24 жана 23 жаштагы жарандары Орусияда жасаган оор кылмышы үчүн издөөдө жүрүшкөн. Алар 28-августка караган түнү Сургут шаарында 36 жаштагы кишинин денесине 100дөн ашык жолу бычак менен жаракат келтиришкен. Ал алган жаракатынан улам окуя болгон жерде көз жумган. Шектүүлөр кийин из жашырып качып кетишкен.

ИИМ аталган жарандар Бишкекте жүргөнү тууралуу маалымат алгандан кийин аларды борбор калаанын кичи райондорунун биринде ижарага алынган батирде жашынып жаткан жеринен кармаган. Шектүүлөр камакка алынды.