Ошто эки мыйзамсыз миграция уюштуруу фактысы аныкталды

Ош облусунун аймагында милиция 23-августтан тартып “Нелегал” аталыштагы ыкчам профилактикалык алдын алуу иш-чарасын өткөрдү. Бул туурасында бүгүн, 5-сентябрда Ош ОИИБинин басма сөз кызматы билдирди.

Маалымдалгандай, кызматкерлер облус аймагына келген чет өлкөлүктөрдүн Кыргызстанда жүрүү тартибин текшеришкен.

"Иш-чаранын жүрүшүндө эки мыйзамсыз миграция уюштуруу фактысы аныкталып, текшерүү иштери жүргүзүлүүдө. Ошондой эле топтолгон материалдын негизинде Кылмыш-жаза кодексинин 330-беренеси (Рассалык, этностук, улуттук, диний же региондор аралык кастыкты (араздашууну) козутуу) боюнча бир кылмыш иши козголду.

Аны менен катар 69 чет элдик жаран ички иштер органдарына алынып келинип, кол бармак издери алынып, профилактикалык сүйлөшүүлөр жүргүзүлдү. 263 административдик протокол толтурулуп, 1 миллион сомдон ашык айып салынды", - деп айтылат маалыматта.

Автор: Замира Ниязбекова